Laufey þjónustumiðstöð

Nýverið opnaði á Suðurlandi ný og glæsileg þjónustumiðstöð fyrir ferðafólk sem staðsett er við afleggjarann að Landeyjarhöfn. Þetta er sú fyrsta í neti þjónustumiðstöðva sem fyrirhugað er að opna víða um land undir nafninu Laufey Welcome Center. Fyrirtækið Svarið ehf. stendur að verkefninu en það er í eigu yfir 30 áhugasamra aðila um bætta innviði, ekki síst þegar horft er til salernisaðstöðu, upplýsingagjafar til ferðamanna og hleðslustöðva fyrir stækkandi rafbílaflota.

Hönnun húsakynna er innblásin af fornri, íslenskri byggingahefð að utan en færir sér í nyt fullkomnustu tæknilausnir innandyra. Í þjónustumiðstöðinni eru m.a. sjálfsafgreiðsluverslun með drykki, snarl og ferðavörur; fullkomin sjálfhreinsandi salerni, gagnvirk upplýsingaborð um áhugaverða staði og þjónustu í nærumhverfinu og allar upplýsingar varðandi áætlanir Herjólfs. Utandyra eru síðan hraðhleðslustöðvar fyrir átta rafbíla og vöktuð bílastæði. Laufey Welcome Center er jafnframt hugsað sem skjól í atburðum eins og óveðri eða náttúruhamförum.

Öryggismiðstöðin kemur að þessu umfangsmikla verkefni með því að leggja til lausnir varðandi aðgangskerfi, brunaviðvörunarkerfi og myndavélakerfi. Öryggishnappar eru á öllum salernum, beintengdir við stjórnstöð. Stefnt er að því að þjónustumiðstöðvarnar verði í framtíðinni opnar allan sólarhringinn og vaktaðar með öryggismyndavélum.