Almennar fréttir
Eigendur eldri timburhúsa hvattir til að huga að brunavörnum
Húsnæðis- og mannvirkjastofnun (HMS) hefur sent eigendum eldri timburhúsa um allt land spurningalista til að stuðla að betri brunavörnum og auka öryggi íbúanna.
Átakið er sett af stað til að bregðast við þeim hættum sem sérstaklega eru tengdar eldri timburhúsum, þar sem eldri byggingar eiga oft ekki við nútímakröfur um brunavarnir. Þetta verkefni er sérstaklega mikilvægt í ljósi bruna á Bræðraborgarstíg árið 2020, þar sem þrír létust þegar kviknaði í húsi sem var byggt árið 1910 og hafði ekki nægar brunavarnir. Í kjölfarið var ákveðið að greina ástand brunavarna í slíkum húsum og finna leiðir til úrbóta.
Spurningalisti sem sendur hefur verið til eigenda í gegnum www.island.is inniheldur 12 lykilspurningar sem varða brunavarnir. Eigendur eru beðnir um að leggja mat á hvort reykskynjarar séu til staðar, hvort slökkvitæki séu aðgengileg, hvort flóttaleiðir séu greiðar, og hvort brunahólfun hússins sé fullnægjandi. Einnig er tekið mið af öðrum þáttum sem geta haft áhrif á brunavarnir. HMS áætlar að um 14 þúsund íbúðarhús á landsvísu falli undir skilgreiningu þeirra á eldri timburhúsum, þar sem húsin voru byggð fyrir 1999 og fylgja því ekki gildandi byggingarreglugerð um nútímalegar brunavarnir.
Samhliða þessari könnun hefur verið hafið fræðsluátak þar sem farið er yfir hvernig best er að efla brunavarnir í þessum eldri timburhúsum til að draga úr hættu á stórbrunum. Frekari upplýsingar má nálgast á vefsíðu HMS, þar sem einnig er veitt leiðsögn um bestu brunavarnirnar og mikilvægar ráðstafanir sem hægt er að taka.
Það er afar mikilvægt að allir sem fá spurningalistann taki sér tíma til að svara honum, því brunavarnir skipta sköpum þegar kemur að því að vernda mannslíf, eignir og heimili gegn hættum elds. Íbúar eldri timburhúsa eru í sérstakri áhættu vegna þess að þessi hús voru oft byggð áður en nútímakröfur um brunavarnir komu til. Það að gera ráðstafanir eins og að setja upp reykskynjara, hafa slökkvitæki tiltæk og tryggja greiðar flóttaleiðir getur í raun bjargað mannslífum.
Við hvetjum alla eigendur eldri timburhúsa til að huga að brunavörnum í húsum sínum og taka virkan þátt í könnun HMS. Það skiptir máli fyrir öryggi allra sem búa í eða nálægt þessum húsum. Aðgerðir sem gerðar eru í dag geta komið í veg fyrir stórslys á morgun.